尋晚夜更，我係R房遇上一個危急病人。
40幾歲，冇長期病患，入嚟發高燒，血壓極低，打咗抗生素，比埋超過兩公升生理鹽水，吊埋「強心藥」，血壓都係得60/30。臨床診斷係嚴重敗血症，好大機會要入ICU。
我想同佢打條「中央靜脈導管」（central venous line insertion）。
突然，我諗起新聞果個十五歲少女。
果一刻我好爭扎；一方面，it’s the right thing to do ，可能可以救到佢。另一方面，我就算好小心都唔擔保100%唔會出現併發症。就算我同佢太太解釋清楚和簽同意書，出咗事一樣可以告我，登我上A1頭版公審。
於是，我開始諗下有咩藉口可以唔同佢做呢個程序。不如，我同佢太太解釋時，將併發症放大，等佢拒絕然後寫低係家屬拒絕？或者不停注射3，4，5公升鹽水，希望佢頂得住？又或者快快手推佢上病房就算？
我諗起一句說話：「君子有所為，有所不為。」
最後導管打咗，noradrenaline 落咗，病人撐到照完電腦掃描，入了ICU。
各位前線嘅醫護同事，在現今惡劣環境下，勿忘初衷，但求問心無愧。
共勉之。
Search